د معمار پرس د خبر له مخې؛ د افغانستان او ازبکستان د سوداګریزو اړیکو کنفرانس د یکشنبې په ورځ، د ۱۴۰۴ کال د ثور په ۲۱مه په کابل کې ترسره شو، چې په ترڅ کې یې د دواړو هېوادونو د سوداګرو ترمنځ د شاوخوا ۴۵ څخه تر ۵۰ ملیون ډالرو په ارزښت د همکارۍ له ۳۰ څخه زیات تړونونه لاسلیک شول.
د صنعت او سوداګرۍ وزارت اعلان وکړ چې دا کنفرانس د دواړو هیوادونو د سوداګریزو شرکتونو او سوداګرو د استازو په پراخه ګډون سره ترسره شو.
په دې غونډه کې د ۱۰۵ ازبک شرکتونو شتون له افغانستان سره د اقتصادي اړیکو پراختیا کې د هیواد د پام وړ لیوالتیا په ګوته کوي.
دا تړونونه د دوه اړخیزو او سیمه ایزو سوداګریزو اړیکو د پراختیا لپاره یو مهم ګام ګڼل کیږي.
