د معمار خبري آژانس د راپور له مخې، استرالیا وايي چې د ښځو او انجونو د ځپلو له امله یې د طالبانو د ځواب ویلو لپاره د بندیزونو یو خپلواک میکانیزم رامنځته کړی چې په هغه کې لږ تر لږه ۱۴۰ تنه او ادارې شاملې دي. استرالیا لومړنی هېواد دی چې دغسې خپلواک چوکاټ د خپل ملي قانون برخه ګرځوي.
د استرالیا حکومت د شنبې په ورځ (۱۵ د قوس)، څلورو طالب چارواکو ته د بشري حقونو د خراب وضعیت په ځانګړي توګه د ښځو او انجونو د حقونو د نقض له امله د مالي بندیز او د سفر د منع امر صادر کړی دی.
پېني وانګ، د استرالیا د بهرنیو چارو وزیرې، په یوه اعلامیه کې ویلي چې دغه طالب چارواکي د ښځو او انجونو په ځپلو، او همدارنګه د ښه حکومتولۍ او د قانون د حاکمیت په کمزوري کولو کې لاس لري.
هغې ټینګار کړی چې استرالیا د طالبانو دا کړنې د نړیوالو بشري حقونو له اصولو سره په ښکاره ډول په ټکر کڼي.
د رویټرز خبري آژانس په راپور کې ویل سوي چې دا بندیزونه به د یادو کسانو شتمنۍ په استرالیا کې کنګل کړي او هغوی ته به د استرالیا خاورې ته د ورتګ اجازه ورنه کړي.
استرالیا په اګست ۲۰۲۱ کې، له امریکا سره په یو وخت، خپل پوځیان له افغانستان څخه وایستل. دا هېواد د ناټو د نړیوالو ځواکونو غړی وو او په تېرو دوو لسیزو کې یې د افغانستان د امنیتي ځواکونو په روزنه او د طالبانو پر ضد په جګړې کې مهم رول درلود.
د استرالیا دا نوي بندیزونه په داسې وخت کې لګېږي چې نړیوالې ټولنې څو ځله د طالبانو له لوري د ښځو پر زده کړو، کار او بنسټیزو ازادیو د سختو محدودیتونو په اړه خبرداری ورکړې دي.
