د معمار خبری آژانس د راپور له مخې، د اروپایې اتحادیې استازولۍ په افغانستان د «OrangeTheWorld» نړیوالې ورځې په مناسبت په یوه پیغام کې بیا ځل د افغان ښځو او انجونو د زدهکړو له ملاتړ څخه خپله قاطع ژمنتیا څرګنده کړې ده. دغه استازولۍ څرګنده کړې چې زدهکړه د ټولو لپاره، په ځانګړي ډول د ښځو او انجونو لپاره، د زیانمن کېدو د کمولو او د بېتاوتریخوالي راتلونکې د جوړولو کلي ده.
اروپایې اتحادیې زدهکړې ته د برابر لاسرسي اهمیت ته اشاره کړې او ویلي یې دي چې په ټولنه کې د ښځو د فعاله ګډون او د زدهکړې حق تضمین پرته، هیڅ ټولنه دوامداره پرمختګ نه سي درلودلی. دا ټینګار په داسې حال کې دی چې د طالبانو حکومت د ۲۰۲۱ کال اګست کې له واکمنیدو روروسته، انجونې له منځنيو او عالي زدهکړو منع کړي دي.
اوس له څلورو کالو څخه زیات وخت کیږي چې د شپږم ټولګي پورته انجونې په افغانستان کې ښوونځي ته د تګ اجازه نه لري. همدارنګه، د ملګرو ملتونو احصایې ښيي چې د تیرو دوه کلونو په ترڅ کې پر افغان ښځو د تاوتریخوالي کچه شاوخوا ۴۰٪ لوړه سوې، چې د بشري حقونو او نړیوالو ادارو اندېښنه یې راپورته کړې ده. اروپایې اتحادیې په پای کې په افغانستان کې د بشري حقونو او زدهکړو ته برابر لاسرسي څخه د خپل ملاتړ پر ژمنتیا بیا ټینګار کړی دی.
