د معمار خبري آژانس د راپور له مخې، د اروپايي اتحادیې استازولۍ د پنجشنبې په ورځ، ۱۳ د قوس، د «OrangeTheWorld» کمپاین (د جنسي تاوتریخوالي په اړه د عامه پوهاوي زیاتول او د ښځو او انجونو ساتنه) په مناسبت په یوه پیغام کې په افغانستان کې د ښځو پر ملاتړ ټینګار وکړ.
دغه بنسټ څرګنده کړه چې افغانې ښځې د باثباته عاید له نشتوالي سره مخ دي او اقتصادي وضعیت یې جدي پاملرنې ته اړتیا لري. په دې پیغام کې راغلي: «اروپايي اتحادیه د ښځو د کوچنیو او منځنیو سوداګریزو پروژو ملاتړ کوي او د هغوی اقتصادي مقاومت پیاوړی کوي.»
د اروپايي اتحادیې دفتر په دوام کې ټینګار وکړ چې افغانې ښځې او انجونې اکثره د بېوزلۍ او د لومړنیو عایداتو د نشتوالي تر ټولو دروند بار زغمي او اقتصادي ملاتړ د هغوی د زیانمنۍ د کمولو لپاره یوه ځواکمنه وسیله ده او کولای سي د هغوی په پیاوړتیا کې مهم رول ولوبوي.
ویل کیږي چې په تېرو څلورو کلونو کې افغانستان د بېوزلۍ او بېکارۍ له امله د بشري بحرانونو تر ټولو لویو ستونزو سره مخ سوی، چې په دې بحران کې ښځې او انجونې تر ټولو زیات زیانمنې سوي دي.
