د معمار خبری آژانس د راپور له مخې، د ترکیې دولتي خبري اژانس «آنادولو» په وینا، اردوغان دا څرګندونې د شنبې په ورځ (۱۷ عقرب) د پاکستان له لومړيوزیر شهباز شریف سره د باکو په ښار کې د لیدنې پر مهال کړې.
اردوغان ویلي: «ترکیه د پاکستان د ترهګریزو بریدونو او له طالبانو سره د وروستیو ترینګلتیاوو حالات له نږدې څاري او هیله لري چې روانې خبرې اترې د دواړو خواوو دایمي ثبات ته لاره هواره کړي.» هغه زیاته کړه چې انقره به د سولې د بهیر او د پاکستان او طالبانو ترمنځ د تاوتریخوالي د کمېدو ملاتړ ته دوام ورکړي.
د ترکیې ولسمشر همدارنګه وویل چې ترکیه او پاکستان هڅه کوي خپلې همکارۍ د سوداګرۍ، انرژۍ او دفاعي صنعت په برخو کې نوره هم پیاوړې کړي. دا څرګندونې په داسې حال کې کېږي چې د طالبانو او پاکستان وروستۍ خبرې اترې د ترکیې او قطر په منځګړیتوب په استانبول کې بېپایلې پای ته رسېدلې، او د سرحدي شخړو د زیاتېدو اندېښنې لا پسې ډېرې سوې دي.
