د معمار خبري آژانس د راپور له مخې، له هغه وروسته چې د طالبانو او پاکستان تر منځ درېيم پړاو خبرې په استانبول کې بېپایلې پاى ته ورسېدې، آصف دراني، د افغانستان لپاره د پاکستان پخواني ځانګړي استازي، د دواړو لورو ترمنځ د پرلهپسې خبرو غوښتنه وکړه.
نوموړي د شنبې په ورځ، د عقرب په ۱۷مه، په خپلې ایکس پاڼه کې ټينګار وکړ چې حتی که خبرې تر دېرشمو پړاوونو ورسېږي، بايد دوام ومومي. هغه وليکل: «ګاونډيان هېڅکله بايد د خبرو اترو دروازه بنده نه کړي؛ دا د تاريخ يوه نه هېریدونکې تجربه ده.» دراني د سيمې پېچلې امنيتي وضعيت ته په اشارې سره خبرداری ورکړ چې د خبرو پرېکون به د «ګډو دښمنانو» په ګټه تمام سي او ټينګار يې وکړ چې د شخړو د حل يوازينی لار د سياسي او ديپلوماټيکو اړيکو دوام دی.
دغه څرګندونې په داسې حال کې کېږي چې د اسلامآباد او طالبانو تر منځ درېيم پړاو خبرې د ژورو اختلافونو له امله بېنتيجې پای ته ورسېدې او د دواړو لورو پلاوو يو بل په بېمسؤليتۍ او نههمکارۍ تورن کړل. دراني له دې وړاندې هم د سيمهييز ثبات لپاره له طالبانو سره د رغنده تعامل پر ارزښت ټينګار کړی وو، خو داسې ښکاري چې د دواړو لورو ترمنځ د بېباورۍ کړکېچ د خبرو اترو پر وړاندې تر ټولو ستر خنډ دی.
