د معمار خبري آژانس د راپور له مخې، آصف دراني، د افغانستان لپاره د پاکستان پخواني ځانګړي استازي، په یوه تازه مقاله کې چې د اسلامآباد او طالبانو ترمنځ د استانبول وروستیو خبرو اترو په اړه لیکل سوې، ویلي چې یوازې پر دې تمرکز کول چې د پاکستانی طالبانو غورځنګ فعالیتونه د افغانستان له خاورې مهار سي، د پاکستان دننه د یاغي بریدونو د ختمولو لپاره اوږدمهاله حل نهدی.
دراني لیکلي چې د پاکستانی طالبانو غورځنګ ماتول په قبایلي سیمو کې یوازې هغه وخت ممکن دي، چې د پاکستان حکومت وکولای سي د دغو سیمو د خلکو ملاتړ ترلاسه کړي. هغه د پخوانیو تجربو په یادولو سره ویلي، د سرحدي سیمو د خلکو ژوره ناخوښي د اسلامآباد له پالیسیو سره، د شورشي ډلو په ځانګړي ډول د TTP د پیاوړتیا سبب سوې ده.
د دراني دا دریځ په حقیقت کې د طالبانو له لیدلوري سره یو شان دی، ځکه طالبانو څو ځله ویلي چې د پاکستانی طالبانو غورځنګ د پاکستان داخلي ستونزه ده او اسلامآباد باید دا مسئله د افغانستان سره ونه تړي. دراني همدارنګه خبرداری ورکړی چې د طالبانو څخه د مستقیم اقدام غوښتنه د TTP پر ضد، پرته له دې چې په قبایلي سیمو کې دایمي حل لارې رامنځته سي، نه یوازې بېپایلې ده، بلکې د دواړو هېوادونو ترمنځ به لا زیات تاوتریخوالی رامنځته کړي.
