د معمار پرس د خبر له مخې؛ د افغانستان د پخواني ولسمشر مرستیال یونس قانوني د افغانستان د جګړې د بیاکتنې کمیسیون په دویمه عامه اوریدنه کې چې د جمعې په ورځ (د حمل ۲۲مه) د متحده ایالاتو په سنا کې ترسره شوه، آنلاین خبرې وکړې.
هغه د ۲۰۰۱ کال د بن کنفرانس نیمګړتیاوو ته په اشارې سره دا غونډه د افغانستان د راتلونکي لپاره یو درس وباله.
ښاغلي قانوني وويل چې د بن په کنفرانس کې د طالبانو نه شتون د هغې له سترو نيمګړتياوو څخه و.
دا کمیسیون هڅه کوي چې د تیرو پریکړو او پالیسیو په څیړلو سره د راتلونکي لپاره درسونه ترلاسه کړي.
د ښاغلي قانوني څرګندونې په داسې وخت کې راځي چې افغانستان لاهم له سیاسي، امنیتي او اقتصادي ستونزو سره لاس او ګریوان دی.
هغه د تلپاتې سولې د ترلاسه کولو لپاره د ټولو خواوو د ګډون او د بهرنیو لاسوهنو د مخنیوي پر اړتیا ټینګار وکړ.
