هغه پناه غوښتونکي چې د پناه غوښتنې غوښتنلیکونه یې رد شوي له اروپا څخه بهر لیږدول کیږي

د معمار پرس د راپور له مخې، د سویډن لومړي وزیر اولف کریسټرسن اعلان وکړ چې اروپايي اتحادیه به د مارچ په میاشت کې د پناه غوښتونکو د ویستلو پروسې ګړندۍ کولو لپاره د ” راستنیدو مرکزونو” جوړولو وړاندیز او غور وکړي. د اکټوبر په میاشت کې، د اروپايي اتحادیې مشرانو دا اعلان وکړ چي دوی پر یوه پلان غور کوي چې له مخې به یې هغه پناه غوښتونکي چې د پناه غوښتنې غوښتنلیکونه یې رد شوي او په اروپا کې د اوسېدو حق نه لري له اروپايي ټولنې بهر هېوادونو کې خوندي مرکزونو ته ولېږدول شي. د آسټریا له چانسلر کارل نهامر سره په خپله لیدنه کې اولف کریسټرسن د وړاندیز احتمالي وخت په اړه بحث وکړ او په اروپايي اتحادیه یې غږ وکړ چې د غیرقانوني کډوالۍ سره د مبارزې لپاره خپلې هڅې زیات کړي.