ملاله یوسفزۍ د مسلمانو مشرانو څخه وغوښتل چې د طالبانو پر وړاندې ودریږي

د معمار پرس د خبر له مخې؛ د بشري حقونو فعالې او د نوبل د سولې جایزې ګټونکې ملاله یوسفزۍ د یکشنبې په ورځ، د جدي په ۲۳مه، په اسلام آباد کې د “په مسلمانو ټولنو کې د نجونو تعلیم” په اړه په نړیوال کنفرانس کې وینا وکړه. په دې وینا کې، هغه هغو محدودیتونو ته اشاره وکړه چې طالبانو په افغانستان کې د نجونو پر تعلیم لګولي دي او د اسلامي هیوادونو له مشرانو یې وغوښتل چې دې ډلې ته مشروعیت ورنکړي. هغه وویل: “طالبان د افغان ښځو او نجونو په وړاندې خپل جرمونه د مذهبي او کلتوري توجیهاتو سره توجیه کوي. دوی په څرګنده توګه ښځو ته د انسانانو په سترګه نه ګوري.”