طالبان: افغانستان د ملي ګټو پر بنسټ رغنده تعاملات غواړي

د معمار پرس د خبر له مخې؛ د طالبانو د اقتصاد وزارت مرستیال عبداللطیف نظري د افغانستان پر وړاندې پر نړیوالو فشارونو نیوکه وکړه او ویې ویل: “موږ د فشار منطق غندو او باور لرو چې دا فشارونه د ناکامۍ سره مخ دي.” هغه له دویچه ویله سره په یوه مرکه کې ټینګار وکړ چې د افغانستان اسلامي امارت د خپلو ملي ګټو په چوکاټ کې د نړۍ له هیوادونو سره د تعاملاتو او خبرو اترو لپاره چمتو دی. نظري روښانه کړه چې د ټول شموله حکومت د جوړولو موضوع یوه داخلي مسله ده او باید د بهرنیو فشارونو تر اغیز لاندې نه وي. هغه زیاته کړه: “د افغانستان د داخلي ستونزو حل کول زموږ د خلکو مسؤلیت دی، او بهرنۍ اړیکې باید د ملي ګټو او زموږ د ټولنې د اړتیاوو پر بنسټ تنظیم شي.