طالبانو په دایکندي ولایت کې کډوالو ته د ځمکو د ویش د بهیر د پیل اعلان وکړ

د معمار پرس د خبر له مخې؛ د طالبانو د مهاجرینو او راستنیدونکو چارو وزارت په دایکندي ولایت کې مهاجرینو او راستنیدونکو ته د استوګنې د ځانګړو ځمکو د ویش د پیل خبر ورکړی دی. د دايکنډي ولايت په مرکز نيلي ښار کې په دې وروستيو کې د مهاجرينو لپاره د استوګنې يو ځانګړی ځای پرانيستل شو. طالب چارواکو د دې ښارګوټي د پرانیستې په مراسمو کې چي په وروستیو کلونو کې د کډوالو لپاره دویمه ورته پروژه ده، وویل: د دې ښارګوټي اصلي موخه د مهاجرینو او راستنیدونکو افغانانو ته ځای ورکول دي. د طالبانو د پوځ مشر فصيح الدين فطرت د دغه ښارګوټي د پرانيستې په مراسمو کې يو شمېر مهاجرينو ته د ځمکې سندونه وسپارل.