طالبانو ته د افغانستان څوکۍ نه سپارل/ د مثبت بدلون پرته دوام به هیڅ پایله ونه لري

ملګرو ملتونو د پرله پسې څلورم کال لپاره په دغه سازمان کې د افغانستان د څوکۍ لپاره د طالبانو غوښتنه رد کړه. طالبانو د افغانستان د نوي واکمنان په توګه د ځان د پیژندلو لپاره پراخې ډیپلوماټیکې هڅې کړې دي. خو ملګرو ملتونو په وار وار د طالبانو هغه غوښتنه رد کړې چې د افغانستان د استازي څوکۍ ته یې وسپاري او دا څوکۍ د تېر حکومت د استازي نصیر احمد فایق په واک کې پاتې ده. دا پریکړه د نړیوالې ټولنې لخوا د افغانستان د مشروع حکومت په توګه د طالبانو د نه پیژندلو ښکارندويي کوي. یو عمده لامل یې د طالبانو د داخلي مشروعیت نشتوالی دی. دا ډول چلند د دې لامل شوی چې طالبان یو غیر دموکراتیک رژیم وګڼل شي چې د افغانانو د ریښتینې ارادې استازیتوب نه کوي. همدارنګه د ښځو د حقونو د محدودولو، د نجونو د ښوونځیو بندول، د بشري حقونو تر پښو لاندې کول او د لږکیو د ځپلو په ګډون د دغې ډلې چلند جدي نړیوالې اندیښنې راپارولي دي. دا کړنه نه یوازې د ملګرو ملتونو بلکې د نړۍ د ډېرو هېوادونو له خوا په کلکه غندل شوې ده. پر دې سربېره، طالبان تر اوسه په نړیواله کچه د باور په رامنځته کولو کې پاتې راغلي دي. د نړیوالې ټولنې لپاره، د افغانستان د استازي په توګه د طالبانو په رسمیت پیژندل د بشري حقونو د اصولو مراعات، قومي او مذهبي تنوع ته درناوۍ او د یوه دیموکراتیک راتلونکي لپاره روښانه لید ته اړتیا لري. که طالبان د افغانستان د خلکو او نړیوالې ټولنې رضایت ترلاسه نه کړي، د دې ډلې او افغانانو لپاره به جدي پایلې ولري. د طالبانو غیر مشروعیت به د نړیوالو بندیزونو د دوام او اقتصادي انزوا لامل شي، چې د افغانانو پر ژوند به مستقیمه اغیزه وکړي. افغانستان چې اوس له پراخو اقتصادي او بشري بحرانونو سره مخ دی، په داسې یوه حالت کې د خپل داخلي وضعیت د ښه کولو توان له لاسه ورکوي. طالبان باید په دې پوه شي چې په نړیوال ډګر کې د افغانستان د مشروعیت د ترلاسه کولو لپاره په خپلو سیاستونو او چلندونو کې اساسي بدلون ته اړتیا لري. دا غوښتنه یوازې د بشري حقونو د درناوي، د یوه ټول شموله حکومت د جوړولو او د نړیوالې ټولنې د باور د ترلاسه کولو له لارې ممکنه ده، او اوسنۍ طریقه د طالبانو واکمني نوره هم منزوي کوي.