د طالبانو یو چارواکی د خلکو د ستونزو پر حل ټینګار کوي

د معمار پرس د خبر له مخې؛ د طالبانو سیاسي مرستیال مولوي عبدالکبیر د ننګرهار او لغمان ولایتونو له مشرانو او علماوو سره په کتنه کې د خلکو د ستونزو د هواري او د هېواد د اقتصادي وضعیت د ښه والي لپاره د دغې ډلې پر ژمنتیا ټینګار وکړ. په دغه کتنه کې چې د دوشنبې په ورځ (د میزان ۲) جوړه شوې وه، د ننګرهار او لغمان ولایت مشرانو او علماوو د خلکو د اقتصادي وضعیت د ښه والي، په لرو پرتو سیمو کې د رغنیزو پروژو پلي کولو او ځوانانو ته د کاري فرصتونو د رامنځته کولو په برخه کې د لا زیاتې پاملرنې غوښتنه وکړه. د ننګرهار او لغمان ولایتونو مشرانو او علماوو هم مخابراتي خدمتونو ته د لاسرسي په ګډون د یو شمېر سیمه ییزو ستونزو د حل په موخه وړاندیزونه وکړل.