د طالبانو په وړاندې د روسیې د ګټو پر بنسټ چلند او د امریکا منافقانه چلند

د روسیې د ولسمشر مرستیال دا خبره اعلان کړه چی طالبان به ډېر ژر په دغه هېواد کې د منع شویو سازمانونو له لېست څخه ویستل شي او دا اقدام د طالبانو په وړاندې د روسیې د چلند د بدلون او له افغانستان سره د دوه اړخیزو اړیکو د پراخولو د هیلې په توګه ارزول کیږي. دا پرمختګونه په داسې حال کې کېږي، چې قزاقستان او قرغزستان تر دې وړاندې هم د ترهګرو ډلو له نوملړ څخه د طالب چارواکو نومونه لرې کړي، چې په سیمه ییز او نړیوال سیاست کې د نویو بدلونونو ښکارندويي کوي. له بلې خوا د امریکا د بهرنیو چارو د وزارت ویاند وايي چې دغه هیواد د طالبانو ډله د یوه تروریستي سازمان په توګه پیژني او دغه وضعیت دوام لري. هغه په ​​ډاګه کړه، چې امريکا او متحدين يې هڅه کوي، چې د ښځو او نجونو پر وړاندې د تبعيضي سياستونو له امله پر طالبانو فشار راوړي. د هغه په ​​وينا، له طالبانو سره د اړيکو د عادي کولو په برخه کې د هر ډول مهم ګام اخيستل له افغان ښځو او نجونو سره د دغې ډلې د چلند په ښه والي پورې اړه لري. روسیه او امریکا د طالبانو په اړه دوه مختلف سیاستونه لري. مسکو د سیاسي او اقتصادي ملاحظاتو له امله له طالبانو سره پراخې اړیکې پالي او د امریکا د نفوذ د مخنیوي لپاره یې په ډېرو قضیو کې د طالبانو پر منفي کړنو سترګې پټې کړې دي. په هرصورت، روسیه حق لري چې خپلو ملي ګټو ته پام وکړي، خو باید د افغان ملت د حقوقو په اړه خپل نړیوال وظیفه ادا کړي. له بلې خوا امریکا یوه پټه پالیسي غوره کړې او هڅه کوي چې ځان د افغانانو د ملاتړي او ژغورونکي په توګه وړاندې کړي، خو زموږ ولس دا نه دي هېر کړي چې د امريکا متحده ايالات وو چې افغانستان يې په اوسني حالت کې راوست او اوس د ښځو له حقونو او د سيمې د امنيت د دفاع په هڅه کې دي. داسې ښکاري چې نه امریکا او نه روسیه د افغانستان له خلکو سره خواخوږي لري، ځکه چې د طالبانو پر وړاندې د امریکا دریځ او د افغانستان له حقونو څخه د دفاع په برخه کې د امریکا پرله پسې شعارونه له واقعیت سره سم نه دي او دا دواړه هېوادونه یوازې د خپلو ملي ګټو د خوندي کولو په لټه کې دي. د افغانستان خلک هیله لري چې حکومتونه به له طالبانو سره د سیاسي معاملې او تعامل په برخه کې له دوی څخه سترګې پټې نه کړي، څو په راتلونکي کې د دوی د کړنو په اړه منفي قضاوت ونه شي او د خلکو حقونه د دوی د ګټو قرباني نه شي.