د طالبانو د کورنیو چارو وزارت: د بخښنې عمومي فرمان په ټولو نارینه او ښځینه مساوي تطبیق کیږي

د طالبانو د کورنیو چارو وزارت ویاند عبدالمتین قانع د افغانستان د پخواني رژیم ښځینه پولیسو د ځورولو د راپور په غبرګون کې اعلان وکړ چی د طالبانو د عمومي بخښنې حکم د ښځو په ګډون پر ټولو مساوي تطبیقېږي. هغه زیاته کړه، په تېر حکومت کې د دندو د ترسره کولو له امله هېڅ کارکوونکی نه ګواښل کېږي او د ګواښ په صورت کې باید کورنیو چارو وزارت ته خبر ورکړل شي. قانع ټینګار وکړ چې ګواښ کول جرم دی او هیڅوک باید خپل هیوادوال نه‌تهدیدوي. په همدې حال کې راپورونه ښيي چې د پخواني رژیم ښځینه پولیسو د طالبانو له وېرې او د کورنۍ تاوتریخوالي له امله ګاونډیو هېوادونو ته تښتېدلې دي.