د طالبانو د مهاجرت د وزیر وژنه او د طالبانو بې غوري

په وروستیو کلونو کې افغانستان تل د بېلابېلو سخت دریځو او ترهګرو ډلو د شتون او فعالیت شاهد دی چې د دغه هېواد امنیت او ثبات یې له ننګونو سره مخ کړی دی. د دغې ډلې د تګلارې یو مهم محور له داعش سره د مبارزې اعلان او په افغانستان کې د هغوي د بشپړې تباهۍ ادعا ده. خو د داعش د عناصرو له خوا د طالبانو د مهاجرت د وزیر خلیل الله حقاني د وژل کیدو په شمول وروستۍ پیښې په افغانستان کې د دغې ډلې د دوام او جدي ګواښ ښودنه کوي. دې برید د طالبانو امنیتي تشې څرګندې کړې او د داعش د بشپړې تباهۍ په اړه یې د دغې ډلې ادعا تر پوښتنې لاندې راوسته. طالبان چې اوس له ګڼو داخلي او بهرنیو ننګونو سره مخ دي، د داعش د ګواښ پر وړاندې له سترو ستونزو سره مخ دي. داعش د تکفیري ایډیالوژۍ سره د یوې افراطي ډلې په توګه هڅه کوي چې په افغانستان او سیمه کې خپل نفوذ پراخ کړي. دغه ډله له سیاسي بې ثباتۍ، اقتصادي بحرانونو او قومي او مذهبي اختلافاتو څخه ناوړه ګټه پورته کوي او هڅه کوي چې د ترهګریزو عملیاتو په ترسره کولو سره د سیمې د هېوادونو امنیت او داخلي یووالي ته زیان ورسوي. په افغانستان کې د داعش عملیات، چې په کې د طالبانو پر مشرانو هدفي بریدونه او د بې ګناه ملکي وګړو وژل شامل دي، د دې ډلې مشخصه ستراتیژي ښیي چې طالبان د واکمن ځواک په توګه کمزوري کړي. که څه هم طالبان ادعا کوي چې د داعش د فعالیتونو یوه لویه برخه یې له منځه وړې ده خو د سیمې واقعیت ښیي چې داعش اوس هم د پیچلو او منظمو عملیاتو د ترسره کولو توان لري. د داعش له ګواښ سره په مقابله کې د طالبانو د استخباراتو کمزوری د دغې ډلې د فعالیتونو د نفوذ او پراخیدو یو له مهمو عواملو څخه دی. د سیمې له نظره په افغانستان کې د داعش د فعالیت دوام د دغه هېواد او ټولو ګاونډیو هېوادونو لپاره جدي ګواښ ګڼل کېږي. دا ډله له سیمه ییزو ناامنیو او بې ثباتیو څخه په استفادې هڅه کوي چې نوې اډې جوړې کړي او له بېلابېلو سیمو څخه افراطي ځواکونه راجلب کړي. د بېلګې په توګه د منځنۍ اسیا هېوادونه چې له افغانستان سره پوله لري د داعش د نفوذ له پراخېدو ډېر اندېښمن دي ځکه دغه ډله کولای شي د افغانستان له پولو څخه په استفادې دغو هېوادونو ته نفوذ وکړي. د داعش او نورو تکفیری ډلو پر وړاندې مبارزه سیمه ییزې او نړیوالې همکارۍ ته اړتیا لری. د سيمې هېوادونه بايد د معلوماتو د تبادلې، د پولو د پياوړتيا او د امنيتي همکاريو د زياتولو له لارې د دغو ډلو د نفوذ د پراختيا د مخنيوي لپاره هڅې وکړي. په دې برخه کې د یوې هراړخیزې سیمه ییزې ستراتیژۍ جوړول چې پکې د سیمه ییزو ځواکونو پیاوړتیا، د افراطیت د بنسټیزو عواملو کمول او د اقتصادي او ټولنیزې پراختیا هڅول شامل دي، له ترهګرۍ سره د مبارزې په برخه کې اغېزمن ګام کېدای شي. له بلې خوا، طالبان په افغانستان کې د واکمن ځواک په توګه باید وښيي چې د تروریستي ګواښونو سره د مقابلې لپاره لازمه وړتیا او اراده لري. که څه هم تر اوسه د طالبانو فعالیت ښودلې چې دغه ډله په دې برخه کې له ډېرو ننګونو سره مخ ده خو د اوسني وضعیت دوام به نه یوازې په افغانستان کې بلکې په نړیواله کچه د دوی حیثیت او امنیت له خطر سره مخامخ کړي. نو په افغانستان او سیمه کې د ترورېزم او تکفیریانو ګواښ یوه پېچلې او څو اړخیزه ننګونه ده چې یوازې په پراخو همکاریو او همغږو ستراتیژیو سره حل کېدای شي. د دې ګواښونو په ژورتیا د پوهیدو سره، نړیواله ټولنه باید د دې پدیدې سره د مقابلې لپاره د هر ډول ګډ اقدام ملاتړ وکړي او که داسې اقدام ونه شي نو وېره ده چې سیمه او په ځانګړې توګه افغانستان به له ګڼو امنیتي ستونزو سره مخ شي.