د طالبانو د سرحدونو وزارت: له ګاونډیو هېوادونو سره تر ۶۰ سلنه زیاتې سرحدي ستونزې هوارې شوې دي

د معمار پرس د خبر له مخې؛ د افغانستان د سرحدونو چارو وزارت مرستیال محمد علي جان احمد له ګاونډیو هېوادونو سره د سرحدي ستونزو په حل کې د پام وړ پرمختګ اعلان کړی دی. هغه اعلان وکړ چې د دغو ننګونو ۶۰ سلنه د خبرو او تفاهم له لارې حل شوي دي. هغه زیاته کړه: “د جمهوریت پر مهال به هره ورځ سلګونه توغندي توغول کېدل، خو اوس نه توغول کېږي او موږ اوس له هېوادونو سره د خبرو له لارې ننګونې حلوو او د افغانستان پر خاوره د تېري د مخنیوي وړتیا لرو.” په دې برخه کې د طالبانو یوه مهمه لاسته راوړنه په کونړ ولایت د راکټي بریدونو د پام وړ کموالی دی. دا په داسې حال کې ده چې په تېر حکومت کې هم په منظم ډول د افغانستان له ختیځو پولو راکټي بریدونه کېدل. خو د پولو د امنیت او له ګاونډیانو سره د اړیکو په برخه کې ډیرې ننګونې پاتې دي.