باخبری سرچینې وایي، تمه ده چې د طالبانو او پاکستان د استخباراتي ادارو مشران د لړم په ۱۵مه نېټه په ترکیه کې د رسمي خبرو لپاره سره وویني. د راپورونو له مخې، د طالبانو پلاوی به د عبدالحق وثیق، د طالبانو د عمومي استخباراتو د رییس، په مشرۍ په دې خبرو کې ګډون وکړي.
بل لور ته، د پاکستان د استخباراتو د ادارې (ISI) مشر، عاصم منیر، به د پاکستاني پلاوي مشري پر غاړه ولري. دغه ناسته په داسې حال کې ترسره کېږي چې د دواړو هېوادونو ترمنځ سیاسي او امنیتي ترینګلتیاوې په وروستیو اونیو کې بېساري لوړې سوې دي.
د افغان کډوالو جبري ایستل له پاکستانه، د سرحدي بریدونو پېښې، او د اسلامآباد هغه تورونه چې وايي طالبان د افراطی ډلو، په ځانګړي ډول د پاکستاني طالبانو غورځنګ (TTP)، ملاتړ کوي، د دواړو هېوادونو اړیکې د یوه ژور کړکېچ تر پړاو رسولې دي.
د شنونکو په باور، د دواړو هېوادونو د لوړپوړو امنیتي چارواکو ګډون په دې خبرو کې د وضعیت د حساسیت څرګندونه کوي او دا هڅه ښيي چې د بحران له لا زیاتېدو مخکې، یو دیپلوماتیک حل ولټول سي. تر اوسه د دې ناستې د اجنډا یا رسمي موضوعاتو په اړه کوم جزئیات نه دي خپاره سوي.
