د معمار خبری آژانس د راپور له مخې، د ایران سفارت په کابل کې د یوې اعلامیې په خپرولو سره ویلي دي چې د افغانستان په شمال کې له زلزلې وروسته یې له زیانمنو کورنیو سره خواخوږي ښودلې ده. په اعلامیه کې ویل سوي: «د ایران اسلامي جمهوریت د افغانستان له سیمهییزو چارواکو سره په همغږۍ کې د زلزلهځپلو خلکو عاجلې اړتیاوې ارزوي او ډېر ژر به د ژغورنې او مرستو بیړني اقدامات پیل کړي.»
سفارت زیاتوي: «ایران به د سختو حالاتو په دې شېبو کې د افغانستان د خلکو تر څنګ ولاړ وي، او له لازمې ارزونې وروسته به بشري او مرستندویه توکي د اغېزمنو سیمو لور ته واستوي.»
په اعلامیه کې ټینګار سوی چې د دواړو هېوادونو د انساني اړیکو او ګاونډیتوب روحیه دا ایجابوي چې د سختیو په وخت کې د افغانستان له ولس سره مرسته وسي او له هېڅ ډول هڅې ډډه ونه سي. دا خواخوږي او د مرستې ژمنه په داسې وخت کې کېږي چې د تېر ماښام زلزلې د هېواد په شمال کې پراخ زیانونه اړولي، ګڼ وګړي یې مړه کړي او سلګونه کورونه یې په بشپړ یا جزوي ډول ویجاړ کړي دي. د سیمې اوسېدونکي اوس هم په سختو شرایطو کې ژوند کوي او بیړنیو مرستو ته اړتیا لري.
