د امریکا او طالبانو ترمنځ د بندیانو تبادله

د معمار پرس د خبر له مخې؛ د طالبانو د بهرنیو چارو وزارت نن (سه شنبه، د دلو ۲مه) اعلان وکړ چې د متحده ایالاتو سره د اوږدو خبرو اترو په پایله کې، د بندیانو تبادله وشوه. په دې تبادله کې، د خان محمد په نوم یو کس، چې په متحده ایالاتو کې په عمري بند محکوم شوی و، د کالیفورنیا له زندانونو څخه خوشې او افغانستان ته راستون شو. د طالبانو د بهرنیو چارو وزارت لخوا په خپره شوې مطبوعاتي اعلامیه کې، خان محمد د “افغان مجاهد” په توګه تشریح شوی، دا اصطلاح طالبان خپلو جنګیالیو ته د اشارې لپاره کاروي.