د افغان ښځو پر زده کړو د بندیزونو دوام او د نړیوالې ټولنې بې غوري

د بشري حقونو د څار سازمان له شپږم ټولګي څخه د لوړو زده کړو څخه د افغان نجونو د انکار د دریمې کلیزې په مناسبت د یوې اعلامیې په خپرولو سره اعلان وکړ چې له ډېرو ژمنو او اندېښنو سره سره نړيوالې ټولنې افغان نجونو ته د زده کړو د حق د بېرته ورکولو لپاره کوم اغېزمن اقدام نه دی کړی. په خبرپاڼه کې راغلي: “په داسې حال کې چې د افغان نجونو د منځنيو زده کړو موضوع په نړيواله کچه ډېر بحثونه رامنځته کړي، خو دولت او نړيوالو بنسټونو تر اوسه دې موضوع ته پام نه دى کړى.” د بشري حقونو د څار سازمان په وینا، د نجونو پر زده کړو د طالبانو بندیز به د هېواد په ښوونیز نظام کې “جنسي نابرابرۍ” بنسټیز کړي. د بشري حقونو دغه بنسټ په دې خبره ټینګار کړی چی د دې حالت دوام به د افغانستان د راتلونکي لپاره نه جبرانېدونکې پایلې ولري او د تخصصي بشري منابعو په ځانګړې توګه د درملنې او ښوونې او روزنې په برخو کې به د سخت کمښت لامل شي. د ملګرو ملتونو د ماشومانو وجهي صندوق (یونیسف) اعلان کړی چې سږ کال به ۳۸ زره نجونې له زده کړو بې برخې شي او په تیرو وختونو کې ښوونځیو ته د تګ د بندیز له امله په کورونو کې پاتې شوي انجونې شمیر یو نیم ملیون اعلان شوی. درې کاله تېر شول چې طالبانو له شپږم ټولګي څخه د پورته نجونو پر زده کړو بندیز ولګاوه او له شپږم ټولګي څخه پورته نجونې او همدارنګه د پوهنتون نجونې له ناڅرګندتیا او محرومیت سره مخ دي. طالبانو د افغانستان د جغرافیې تر کنټرول وروسته د مناسبو شرایطو د نشتوالي په پلمه پر ښځو دغه بندیزونه ولګول چې له بده مرغه تر اوسه دوام لري. د طالبانو له خوا د ښځو د زده کړو منع کول د دغې ډلې، د افغانستان د خلکو او نړیوالې ټولنې په وړاندې یوه لویه ننګونه ګرځېدلې ده. په زړه پورې خبره دا ده چې د اسلامي نړۍ علماوو تل له طالبانو غوښتي چې دغه بندیزونه پای ته ورسوي، خو د دوی له منفي غبرګون سره مخ شوي دي. د زده کړې حق د هر انسان له اساسي او دیني حقونو څخه دی، چې دیني تعلیمات یې پر ترلاسه کولو ډېر ټینګار کوي خو طالبانو د دین په اړه په خپل سطحی پوهاوي سره د هیواد ښځې جلا کړي او له دې حقه یې بې برخې کړي دي. که څه هم ځينې هېوادونه له طالبانو سره د سياسي مصلحت پر بنسټ متقابلې اړيکې لري، خو د ښځو په اړه د طالبانو نظرونه او تګلارې د حکومت، خلکو او نړيوالې ټولنې ترمنځ د تعامل د واټن د زياتېدو لامل شوې دي. داسې ښکاري چې تر هغه چې په افغانستان کې د ښځو پر زده کړو بندیز دوام ولري، نه یوازې دا چې پر ښځو به لوی ظلمونه وشي، بلکې د طالبانو په رسمیت پېژندنه به هم د بې باورۍ په فضا کې پاتې شي ځکه زده کړه یو منل شوی ملي او نړیوال حق دی او په دې لاره کې هر ډول خنډ د غندنې او د منلو وړ نه دی.