د معمار خبری آژانس د راپور له مخې؛ د پاکستان لهخوا د افغان مهاجرینو د اخراج د دوام له امله، د مهاجرت چارو پوهانو او د بشري حقونو فعالانو د افغانستان د جنوبي پولو په اوږدو کې د یو انساني ناورین د رامنځته کېدو په اړه خبرداری ورکړی دی. محمدخان طالبی، د مهاجرینو د حقونو فعال، وایي که نړیواله ټولنه د افغانستان او پاکستان د پولې په اوږدو کې فوري او مؤثر اقدامات ترسره نهکړي، د یو بشري ناورین رامنځته کېدل لرې خبره نه ده.
د طالبی په وینا، اقتصادي او بشري شرایط د افغانستان په دننه کې مات دي او د پاکستان لهخوا د مهاجرینو ډلهيیز اخراج د استوګنې او د دغې زیانمنې سوې ټولنې د لومړنیو اړتیاوو د پورهکولو ستونزې زیاتې کړي دي. هغه ټینګار وکړ چې طالبان د دې بحران د مهار وړتیا نهلري او د سرحدونو په اوږدو کې انساني او خدماتي بنسټونه سخت ناکافي دي.
دغه د مهاجرینو د حقونو فعال همدارنګه د پاکستان او طالبانو ترمنځ د زیاتېدونکو کړکیچونو یادونه وکړه او ویې ویل چې دواړه لوري باید خپلې سیاسي شخړې د خبرو له لارې حل کړي او د افغانستان د بېپناه خلکو پر اوږو نور د بحران بوج وانچوي. هغه له نړیوالې ټولنې وغوښتل چې د نندارچي په توګه د پاتې کېدو پر ځای، د بېړني بشردوستانه ملاتړ له لارې د دغو مهاجرینو لپاره د استوګنې، خوړو، روغتیا او سرپناه حداقلي شرایط برابر کړي.
