د معمار خبري آژانس د راپور له مخې، د چهارشنبې په ورځ، یو شمېر افغان پناه غوښتونکي او مدني فعالان د آلمان په بن ښار کې د افغانستان د قونسلګرۍ مخې ته راټول سوی او د طالبانو پر ضد او د افغانستان د ښځو د ملاتړ شعارونه یې ورکول، خپل اعتراض یې د هېواد روان وضعیت ته څرګند کړ.
دا غونډه د زرمینه پریاني په ابتکار جوړه سوې وه، چې د طالبانو پخوانۍ بندۍ او یوه معترضه ښځه ده. هغې په وینا کې، د نیونې او شکنجې دردناکې خاطرې په یادولو سره وویل: «کله چې موږ په خپل کور، په خپل وطن کې په امان نه وو او طالبانو د نیمې شپې پر وخت زموږ د کور دروازه ماته کړه، نو په دې نړۍ کې نور زموږ لپاره هېڅ خوندي ځای نسته.»
ګډون کوونکو د «طالب د ښځو دښمن دی»، «موږ عدالت غواړو» او «نړۍ باید چپ پاتې نه سي» په شان شعار پاڼې په لاس کې نیولي وې او د طالبانو پر ضد د نړیوال فشار غوښتنه یې وکړه، څو د بشر حقونه، په ځانګړې توګه د ښځو حقونه رعایت سي.
د دې غونډې جوړونکو ټینګار وکړ چې د دوی مدني مبارزه، حتی په تبعید او جلا وطنۍ کې هم، دوام لري او د افغانستان د ښځو او د ځپلو قربانیانو غږ به چپ نه سي.
