د معمار وحدت د خبری آژانس د خبر له مخې؛ د پاکستان د سوداګرۍ وزیر نوید قمر د شنبې په ورځ (د اسد ۲۹) په اسلام اباد کې د یوې غونډې په څنډه کې وویل چې د ویزو ورکول به د دواړو هېوادونو ترمنځ د سوداګرۍ په بهیر کې اسانتیاوې رامنځته کړي.
د پاکستان د بهرنیو چارو وزیر هم دا ویلي چې هېواد یې له ازبکستان سره یو تړون لاسلیکوي چې په متقابل ډول د لاریو چلوونکو ته شپږ میاشتې ویزې ورکوي.
ښاغلي قمر زیاته کړه: “پاکستاني لارۍ به نه یوازې افغانستان ته بلکې ازبکستان ته هم ځي.”
هغه د واګې له پولې د افغان بار وړونکو موټرو د غوښتنې په اړه وویل چې له هند سره د سیاسي کړکېچ له امله دا کار ممکن نه دی.
د پاکستان د بهرنیو چارو وزیر دا هم یادونه وکړه: “کله چې له هند سره وضعیت عادي شي، موږ به دا مسله په نظر کي ولرو.”
د پاکستاني رسنیو د احصايوي معلوماتو له مخې، وروسته له هغه چې طالبانو د افغانستان واک تر لاسه کړ، افغانستان ته د پاکستان صادرات ۳۰ سلنه کم شوي او ۷۱۷.۵۳ میلیونه ډالرو ته رسېدلي دي.
