افغانستان د داعش په اړه د سیمه ییزو اندیښنو مرکز پاتې دی

افغانستان، چې د داعش ترهګرې ډلې د فعالیتونو له امله د امنیتي ګواښونو مرکز دی، نه یوازې خپل داخلي امنیت بلکې سیمه ایز ثبات هم اغیزمن کړی دي. سره له دې چې طالبان د دې ډلې د ځپلو ادعاوې کوي، د داعش د خراسان څانګې لاهم یو جدي ګواښ دی. د ډله‌ییز امنیت تړون سازمان د عمومي منشي ایمانګلی تاسماګمبتوف د څرګندونو له مخې، افغانستان د منځنۍ اسیا لپاره د احتمالي ترهګریزو او مخدره توکو د قاچاق ګواښونو د سرچینې په توګه پیژندل شوي دي. دا اندیښنې د داعش او د هغې پورې تړلو افراطي شبکو په څیر ډلو د فعالیتونو د پراختیا څخه راپورته کیږي، کوم چې د افغانستان داخلي امنیت او سیمه ایز ثبات هم ګواښوي. وروستۍ پېښې، لکه د کډوالو چارو وزیر او د حقاني شبکې د یو لوړ پوړي غړي خلیل الرحمن حقاني وژنه، په افغانستان کې د داعش پراخ نفوذ په ګوته کوي. دا ترهګریز فعالیتونه نه یوازې د افغانستان داخلي ثبات کمزوری کوي، بلکې دا هم ښیي چې داعش لاهم د پیچلو عملیاتو د ترسره کولو توان لري. سربېره پردې، په نورو هېوادونو لکه فرانسه کې د داعش سره د تړاو لرونکو کسانو د نیول کېدو وروستي راپورونه، چې د ترهګریزو بریدونو پلان یې درلود، ښيي چې دا ډله یو نړیوال ګواښ دی او فعالیتونه یې یوازې افغانستان پورې محدود نه دي. د ترهګریزو ګواښونو سربیره، له افغانستان څخه د مخدره توکو قاچاق په سیمه کې د یوې بلې امنیتي ننګونې په توګه راڅرګند شوي دي. دا پدیده د ګاونډیو هیوادونو اقتصاد او امنیت اغیزمنوي، او همدارنګه د داعش په څیر ترهګرو ډلو لپاره د عاید سرچینې په توګه کار کوي. په پایله کې، د مخدره توکو د قاچاق سره مبارزه او د دې ډلو د مالي سرچینو بندول د امنیتي ګواښونو د کمولو په لور یو بنسټیز ګام دی. د دې اندیښنو د کمولو لپاره سیمه ییزه او نړیواله همکاري اړینه ده. طالبان، د افغانستان د اوسنيو واکمنانو په توګه، باید د داعش په څېر ترهګرو ډلو سره د مقابلې لپاره جدي اقدامات وکړي. په دې اقداماتو کې د سرحدي کنټرول پیاوړتیا، د ګاونډیو هیوادونو او نړیوالو سازمانونو سره د استخباراتي همکارۍ زیاتول، او د ترهګرو شبکو په وړاندې د پوځي عملیاتو ترسره کول شامل دي. همدارنګه، طالبان باید د ترهګرۍ سره د مبارزې لپاره خپلو نړیوالو ژمنو ته غاړه کیږدي او اجازه ورنکړي چې د افغانستان خاوره د ترهګرو فعالیتونو لپاره اډه شي. له بلې خوا، د ډله‌ییز امنیت تړون سازمان غړي هیوادونه او نور نړیوال لوبغاړي باید په افغانستان کې د داعش د شتون او فعالیتونو په وړاندې مسؤلانه چلند وکړي، ترڅو داعش ته اجازه ورنکړل شي چې ځانونه سمبال کړي او نور پراخ فعالیتونه ترسره کړي. دا، د منظمو نړیوالو غونډو په ترسره کولو سره، لکه د ملګرو ملتونو د امنیت شورا غونډه، کولای شي د داعش ګواښ سره د مبارزې لپاره د پراخې همغږۍ او ګډو حل لارو په غوره کولو کې مرسته وکړي. له همدې امله، په افغانستان او سیمه کې د داعش فعالیتونو څخه د راپورته کیدونکو امنیتي اندیښنو کمول جامع ژمنې او همکارۍ ته اړتیا لري. طالبان، د افغانستان د اوسنيو واکمنانو په توګه، باید د سیمه ییز امنیت لپاره لوی مسؤلیت وښيي او د ګاونډیو هیوادونو او نړیوالې ټولنې سره په همکارۍ، د ترهګریزو ګواښونو او د مخدره توکو د قاچاق سره مقابله وکړي ترڅو د خونړۍ داعش ګواښ، چې هیڅ ډول اصولو او قوانینو ته غاړه نه ږدي، په بشپړه توګه له سیمې څخه له منځه یوړل شي.