د طالبانو جګپوړی غړی: هیچا ته به اجازه ورنه کړو چې افغانستان ته زیان ورسوي

د معمار پرس د خبر له مخې: په قطر کې د طالبانو د سیاسي دفتر مشر سهیل شاهین د پاکستان د دفاع وزیر وروستیو څرګندونو ته غبرګون ښودلی او ویلي یې دي چی د دې ډلې حکومت به هیچا ته اجازه ورنکړي چې افغانستان ته زیان ورسوي. تر دې وړاندې د افغانستان د دفاع وزارت هم د پاکستاني چارواکو د څرګندونو په غبرګون کې پر افغان خاوره د احتمالي برید په اړه خبرداری ورکړی و او ټینګار یې کړی و چې د دغه ډول پرېکړې پایلې به د اسلام اباد پر اوږو وي. په داسې حال کې چې پاکستاني چارواکي کابل د دغه هېواد پر ضد د جنګیالیو په ملاتړ تورنوي، خو د طالبانو حکومت تل ټینګار کړی چې له دوو کلونو زیات افغانستان هېڅ هېواد ته ګواښ نه دی.