د طالبانو د ازموینو ادارې په ۱۶ ولایتونو کې د کانکور ازموینې پیل اعلان کړ

د معمار پرس د خبر له مخې، دې ادارې په ایکس ټولنیزې پاڼې کې لیکلي چې د ۱۴۰۳ کال ازموینه نن (پنجشنبه د جوزا ۱۷مه) په ۱۶ ولایتونو کې په رسمي ډول پیل شوه. د سرچينې د معلوماتو له مخې، په لوګر، پروان، کاپيسا، پنجشير، غزني، پکتيا، پکتيکا، زابل، باميان، سمنګان، نورستان، بادغيس، هرات، غور، ميدان وردګو او کونړ ولايتونو کې د کانکور د شاگردانو د بايومټريک پروسه د سه شنبې څخه پيل شوي وه. ټاکل شوې د ۱۴۰۳ کانکور ازموینه په پنځو پړاونو کې واخیستل شي، چې لومړی پړاو به یې د روان کال د جوزا میاشتې په ۱۷مه، ۱۸مه او ۱۹مه په ۱۶ ولایتونو کې ترسره شي او دویمه مرحله به د سرطان په لومړۍ او دوهمه نېټه یوازې په کابل کې ترسره شي. په افغانستان کې د کانکور ازموینه په داسې حال کې اخیستل کېږي چې د تېرو دوو کلونو په څېر په دې ازموینه کې نجونې د ګډون اجازه نه لري.