د قدس ورځې په لاریون کې ګډون یو انساني او اسلامي دنده ده

اسراییلو په تیرو ۲۴ ساعتونو کې د غزې په بې کوره خلکو ۱۰ جنایتونه کړي چې په پایله کې یې ۹۲ تنه شهیدان او ۱۵۶ تنه نور ټپیان شوي دي.
په غزه کې د فلسطین د روغتیا وزارت اعلان وکړ چې په غزه کې د جګړې د شهیدانو شمیر ۳۳۰۳۷ تنو ته او د ټپیانو شمیر ۷۵۶۶۸ تنو ته لوړ شوی دی.
د دغه راپور له مخې تر اوسه هم څه باندې ۷۰۰۰ کسان لادرکه او تر خاورو لاندې دي او پر دې سربیره د غزې د جګړې د ټولو قربانیانو ۷۳ سلنه ښځې او ماشومان دي.
د غزې د خلکو په خلاف د صهیونیسټي رژیم د جنایتونو له پیله شپږ میاشتې تیرې شوې دي او دغه غاصب حکومت د غزې د خلکو په قتل عام لاس پورې کړی دی. اسراییلو د لویدیځ او په ځانګړې توګه د امریکا په ملاتړ د غزې د خلکو د وژلو لپاره داسې اقدامات کړي چې نړۍ یې حیرانه کړې ده.
په داسې حال کې ده چې هغه لوېديځ هېوادونه چې د بشري حقونو خبره کوي او ملاتړ يې کوي، نه يوازې په غزه کې د ماشومانو په وژلو سترګې پټوي، بلکې اسرائيلو ته د وسلو او مهماتو په لېږلو سره د اسرائيلو په قتل عام او ظلم کې هم شريک دي.
که څه هم د نړۍ ډیرو هیوادونو د غزې له خلکو سره خپل پیوستون اعلان کړی او د صهیونیسټانو د جنایتونو په وړاندې یې غبرګون ښودلی دی خو په غزه کې د کړکېچ د کچې په پام کې نيولو سره د لا زياتو جنايتونو د مخنيوي لپاره د ولسونو له خوا لا زياتو تدبيرونو ته اړتيا ده.
په اوسنیو حالاتو کې نړۍ د فلسطین او غزې د خلکو په وړاندې له یوه ستر امتحان سره مخامخ شوې ده. له یوې خوا خلک بې دفاع او د وژل کیدو له خطر سره مخامخ دي او له بلې خوا صهیونیسټ رژیم چې هیڅ اصول او مقررات نه مني.
اوس چې موږ د قدس نړیواله ورځ په مخ کې لرو، یوازینۍ مرسته چې د نړۍ ملتونه د فلسطین له ولس سره کولای شي، د روژې د میاشتې د وروستۍ جمعې په لاریون کې ګډون دی. په دغه لاريون کښې په ګډون سره د نړۍ ټول مسلمانان او ازاد خلک بايد د غزې د بې دفاع خلکو فرياد د نړۍ غوږونو ته ورسوي او له خپلو حکومتونو څخه په جدي توګه وغواړي چې له صهيونېسټ رژيم سره په خپلو تعلقاتو باندې له سره غور وکړي او د دغه ناروا حکومت انساني ضد کړنې باید وغندي.
که اسلامي هېوادونه د اسرائیلو پر ضد سره متحد شي، نه یوازې په غزه کې قتلونه او جنایتونه به پای ته ورسېږي، بلکې د دغه جعلي حکومت د ړنګېدو لپاره به هم زمینه برابره شي او د فلسطین اشغال شوې خاوره به د اسلامي جغرافیې بدن ته ورګرځي.
نو موږ انساني او اسلامي مسووليت لرو چې د اسرائيلو د جنايتونو په وړاندې چوپ پاتې نه شو او د قدس د ورځې په لاريون کې په ګډون سره د غزې له خلکو سره خپل پيوستون اعلان کړو.