طالبانو غوښتي چې د ملګرو ملتونو څوکۍ دې دغې ډلې ته وسپاري

د معمار پرس د خبر له مخې؛ د طالبانو ویاند ذبیح الله مجاهد د شنبې په ورځ (د حوت ۲۶مه) د طالبانو تر کنټرول لاندې ملي راډیو او ټلویزیون سره په مرکه کې په افغانستان کې د یوناما د ماموریت د غځولو هرکلی وکړ او له یوناما یې وغوښتل چې په ملګرو ملتونو کې د افغانستان څوکۍ طالبانو ته ورکړل شي. ښاغلي مجاهد د دې په منلو سره چې طالبان له نړیوالو هېوادونو او سازمانونو سره اړیکو ته اړتیا لري، له یوناما څخه وغوښتل چې د اړیکو په پراختیا کې د مرستې له لارې افغانستان له نړۍ سره ونښلوي. په دوحه کې د طالبانو د سیاسي دفتر مشر سهیل شاهیل په ملګرو ملتونو کې د افغانستان څوکۍ ته د دې ډلې نوماند دی، چې تر اوسه چا نه دی منلی. دا مهال نصیر احمد فایق په ملګرو ملتونو کې د افغانستان د استازي په توګه دنده ترسره کوي.