اسراییل د مقاومت د محور د قوماندانانو په وژلو سره څه هدف تعقیبوي؟

د شهید قاسم سلیماني د تلین په مراسمو کې تروریستي پیښه چې په پایله کې یې ګڼ شمیر مینه وال شهیدان او ټپیان شول، دې وښودله چې ترهګري او د ملتونو د ازادۍ دښمنان په هره طریقه د سیمې د امنیت د ګډوډولو فکر کوي. د اسلام دښمنان هڅه کوي چې خپل وجود وساتي او د ترهګرو او نیواکګرو سره د مبارزې په لاره کې د تروریستي اعمالو او وحشت په رامنځته کولو سره د مسلمانانو اراده کمزورې کړي. نړیوال استکبار او په ځانګړې توګه صهیونیسټ رژیم چې په سیمه کې د اشغال او غصب په پلمه جوړ شوی دی، غواړي د مجاهدینو او مقاومت د قومندانانو په وژلو او بیا د خلکو په وژلو سره خپلې موخې ترلاسه کړي. په تېرو څو ورځو کې اسرائیلو څو ایراني، فلسطیني او لبناني قوماندانان ووژل. دا وژنې په فلسطین، لبنان او سوریه کې شوي دي. په غزه کښې دجګړې له شروع کیدو او دصهیونیسټ رژیم له سختو ګوزارونو وروسته دغه رژیم په ډیرو خرابو امنیتی او دفاعی شرایطو کښې ځان ولید. له همدې امله یې د غزې د بې دفاع خلکو د قتل عام او د مقاومت د محور د لوړ پوړو قومندانانو په وژلو سره د خپلې ناکامۍ او محاصرې د پټولو لپاره د وژنې جنګي ماشین پیل کړ. په داسې حال کې چې نړۍ د اسرائیلو له نسل وژنې څخه خپله کرکه اعلانوي، له دغه رژیم څخه د امریکا بې پرې ملاتړ ښيي چې د دوی حکومت هم په دغو جنایتونو کې شریک دی. اسراییل د مقاومت د محور د قوماندانانو په وژلو سره هڅه کوي چې دغه جبهه کمزورې کړي او ځان د یوه داسې طوفان په څپو کې مومي چې د دغه رژیم د ډوبیدو لامل به شي. په کرمان کې د تروریستي عمل څرنګوالی او هغه هم د شهید سلیماني د تلین په مناسبت دا ګونګوسې پیاوړې کوي چې د دې قضیې تر شا د اسراییل لاس دی. دا مهال په سیمه کې پرمختګونه په داسې حال کې روان دي چې په سیمه کې د یوې بشپړې جګړې امکان پیاوړی شوی دی. صهیونیسټ رژیم ایران او هم د مقاومت جبهې پاروی. دا رژیم فکر کوي چې په یوه پراخه جګړه کې د ایران په ګډون کولای شي بریا ترلاسه کړي. خو هغه ناخبره دی چې د یوې لویې جګړې رامنځته کېدل به د اسراییلو د تباهۍ لامل شي. د ایران، عراق، سوریې، لبنان او فلسطین د خلکو په شمول د مینځنی ختیځ د سیمې خلک په خپل مقاومت او دریځ سره صهیونیسټ رژیم او د هغې اجنټانو ته به اجازه ورنکړی چې په خپلو ترهګرو اقداماتو سره په سیمه تسلط ولری. له ترهګرۍ سره مبارزه یوه نړیواله دنده ده او باید ټول هېوادونه په دې مبارزه کې برخه واخلي. نړيواله ټولنه بايد په لازمو تدبيرونو سره د تروريستي ډلو مخه ونيسي او د دغې ناوړه پديدې د له منځه وړلو لپاره زمينه برابره کړي.