د ټول‌شمول حکومت په نشتوالي کې ټول‌شمول فقر

د خوړو نړیوال سازمان اعلان کړی، چې د مرستو د کمښت له امله سږ کال د ۱۰ میلیونو اړمنو افغانانو نومونه د مرستو د ترلاسه کوونکو له لیست څخه ایستل شوي دي. دغه بنسټ ویلي چې په هغه هېواد کې چې له هرو دریو کسانو څخه یو یې د شپې له خوا له خوړو پرته ویده کېږي، کورنۍ هڅه کوي چې ماشومان ګرم وساتي او خواړه ورته برابر کړي. د خوړو نړیوال سازمان: که څه هم د افغانستان په بازارونو کې خوراکي توکي ډېر دي، خو خلکو یې د پېرلو توان له لاسه ورکړی دی. په دې وروستیو کې ملګرو ملتونو اعلان وکړ چې په افغانستان کې تر ۲۰ میلیونو ډېر خلک بشري مرستو ته اړتیا لري. د خوړو برابرول د هر انسان له اساسي او اړینو اړتیاوو څخه ده، خو له بده مرغه دا اړتیا زموږ د ډېرو خلکو لپاره یوه نه پوره کېدونکې هیله ګرځېدلې ده. په افغانستان کې سختو اقتصادي حالاتو خلک له جدي ننګونو سره مخ کړي دي. د کار نشتوالي او همدارنګه د نړیوالو مرستو کموالي د خوراکي توکو د چمتو کولو په برخه کې اندېښنې زیاتې کړي دي. په افغانستان کې سیاسي پرمختګونه د دې کړکېچ اصلي لامل دی او په هر بدلون کې دا ولس دی چی له هر ډول ستونزو سره لاس او ګریوان دی. په دې کې د نورو عواملو په پرتله د حکومت ونډه ډېره معلومیږي. ځکه دولتونه د خوندي اقتصادي چاپېریال د رامنځته کولو او د اغېزمن مدیریت د بنسټ اېښودلو مسوولیت لري. له څه باندې دوو کلونو وروسته هم د طالبانو اداره نه ده توانېدلې چې د خلکو د اړتیاوو په هوارولو او هم افغانستان ته د نړیوالو د پام اړولو په برخه کې هوښیارانه عمل وکړي. دوی د ګروپي او ذوق پالو سیاستونو په جوړولو سره افغانستان د انزوا په لور روان کړی دی چې د خلکو د فقر او بې وزلۍ سبب شوی دی. دا خلک چې داسي له کړاوونو سره مبارزه کوي څنګه د طالبانو د واکمنۍ په اړه چې د یوټوپیا د جوړولو ادعا کوي خوشبین شي؟ د خلکو د لومړنیو او عاجلو اړتیاوو پوره کول د هر حکومت له نسبي بریاوو څخه ده، چې د حکومت په وړاندې د خلکو په چلند مستقیمه اغیزه لري. خو دا موږ خلکو ته پرېږدو چې قضاوت وکړي چې طالبان په دې برخه کې څومره بریالي شوي دي.