د طالبانو پر وړاندې د امنیتي ځواکونو د ناکامۍ پړه څوک پر غاړه لري؟

د ناروې د پوځ یوه پخواني افسر سټیفن جینسن په یوه ټویټ کې لیکلي: دا یو له شرمه ډک درواغ دی چې ویل یې افغان پوځي ځواکونه د طالبانو پر ضد جګړه نه ده‌کړي. د ناروې د پوځ پخواني افسر ویلي چې افغان ځواکونه “د دوزخ په څېر جګړه کول”، خو په ۲۰۲۱ کال کې موږ هغوی ته له مهماتو، خوړو، اوبو او هوايي ملاتړ پرته پرېښودل. دغه ناروېژي عسکر يادونه وکړه چې امريکا او ناټو له افغانستان سره د دوامداره مرستو ژمنه کړې وه، خو ټرمپ او بایډن د دې ژمنې برعکس جګړه پای ته ورسوله. هغه ټینګار وکړ، چې له ۲۰۱۴ کال وروسته د طالبانو پر ضد جګړه د امریکا او ناټو له خوا نه، بلکې د افغان حکومت له خوا ترسره کېدل. په افغانستان کې د ناروې د پوځ یو پخوانی افسر وايي، د دوحې تړون او د بهرنیو ځواکونو وتل افغان ځواکونو ته ستر ګوزار و. د هغه په ​​وینا ټرمپ له طالبانو سره د دوحې تړون د افغان حکومت له مداخلې پرته لاسلیک کړ او بایډن یې تر ټولو بده عملي کړ. سټیفن جینسن لیکلي چې افغان ځواکونه جګړې ته ژمن وو، خو “د دې سیاسي تیاتر پایله د افغانستان لپاره ویجاړونکې وه.” د ښاغلي جینسن او د کارپوهانو په وینا په افغانستان کې میشتو بهرنیو ځواکونو د افغان پوځ د پیاوړتیا او تجهیز لپاره هیڅ ډول مرسته نه وکړل. له افغانستان څخه د بهرنیو ځواکونو ناڅاپي او غیر پلان شوي وتل د افغان امنیتي ځواکونو د ناکامۍ پیلامه ده. غربي هېوادونه د افغانستان د خپلواکۍ او خودکفاۍ په لټه کې نه وو، بلکې په افغانستان کې د اشغال او د خپلو ګټو د خوندي کولو په لټه کې وو. په افغانستان کې د امنیتي ځواکونو د ناکامۍ او د طالبانو د واکمنۍ په صورت کې، امنیتي ځواکونه ملامت نه شي کېداي ځکه چې دوی د لوړ پوړو چارواکو څخه امرونه ترلاسه کول. یوشمېر کارپوهان په دوحه کې د طالبانو او امریکا ترمنځ د پردې تر شا هوکړه لیک د جمهوري نظام د سقوط لامل ګڼي او په دې باور دي، چې امریکا په افغانستان کې د خپلو اهدافو په ترلاسه کولو کې له ناکامۍ وروسته، طالبانو ته د افغانستان په سپارلو سره د افغانستان له بحران څخه د ځان ژغورنې پرېکړه کړې. د دې په وینا، د افغان امنیتي ځواکونو ناکامي د دوی د بې کفایتۍ او په دندو کې د غفلت پایله نه وه، بلکې د حکومت د مشرانو خیانت او د غرب دسیسې دا کار په افغانستان کې وکړ، چې هېواد یې په یوه شپه د طالبانو لاس ته ولوېد او زموږ د ملت بېلابېلې لاسته راوړنې یې په خاورو کې خاورو ته وسپارلې.