اقتصادي بې وزلۍ او د صنعت بیا رغولو او د تولید سوکالۍ ته د پاملرنې اړتیا

د طالبانو د کانونو او پټرولیم وزارت اعلان وکړ چې د جوزجان له مرکز شبرغان ښار څخه د بلخ مرکز مزارشریف ښار ته د ګازو د لېږد نوې پایپ لاین د طالب چارواکو په حضور کې پرانیستل شو. د دغه وزارت د اعلامیې له مخې، د ګازو د لېږد دغه پایپ لاین چې ۹۴.۵ کیلومتره اوږدوالی لري او د ۶۰۹ میلیونو افغانیو په لګښت په بېلابېلو صنایعو لکه سرې او برېښنا، شیشې جوړولو او برېښنا تولید کې د ګټې اخیستنې لپاره ډیزاین او جوړ شوی دی. دوی اعلان کړی چې په نږدې راتلونکي کې به له دې نل لیکې څخه ګاز د استوګنې سیمو ته وویشل شي. همداراز طالبانو په یوه بل خبر کې اعلان کړی چې د دې ډلې د کانونو او پټرولیم وزارت سرپرست د سرپل ولایت د قشقري په سیمه کې د نفتو لومړنۍ څاه پرانیستله. په دې اړه د طالبانو ویاند ذبیح الله مجاهد په خپله ټویټر پاڼه لیکلي:«افغانستان به ډېر ژر د خپلو تیلو او ګازو خاوند شي، زموږ هېواد له هر اړخه بډایه او ستر ظرفیتونه لري، یوازې کار او هڅو ته اړتیا لري. ” په داسې حال کې چې افغانستان د داخلي پرمختګونو او د طالبانو د تسلط له امله په بشپړ بحران کې دی، زموږ د هیواد په رسنیو کې د داسې خبرونو ځای خالي او له توقع څخه لرې دی. په هېواد کې پانګونه په بې ساري ډول کمه شوه او ډېری اقتصادي فعالان له هېواده ووتل او بهرنیو هېوادونو ته یې پناه یوړه. په اوسني حالت کې زموږ هېواد یوازې یو مصرفي هېواد دی، چې د صنعتي او اقتصادي زیربناوو څرخونه په ټپه درېدلي او دغه رکود د خلکو لپاره بدې پایلې راوړي دي. فقر، بې روزګاري، کډوالي، نا امیدي او همدارنګه د افغانستان په یوه کمزوري او پر انحصاري هېواد بدلېدل د دې پېښې له مهمو پایلو څخه دي. کله چې یو هېواد په بشپړه توګه پر نورو متکي وي، نه شي کولای ځان خپلواک او آزاد وګڼي، ځکه د اړتیاوو د رسولو په ګډوډولو سره دا خلا نه شي جبرانولای او په پایله کې یې ستر اقتصادي او ټولنیز زیانونه لیدل کېږي. له بلې خوا، هغه هېوادونه چې کمزوری اقتصاد او صنعت لري په نننۍ نړۍ کې ګټور رول نه شي لوبولی. نو په اوسني حالت کې زموږ د هېواد مهمه او اساسي اړتیا دا ده چې په کورنیو ظرفیتونو تکیه وکړو او د تولیدي عواملو د ودې او فعالیت لپاره پلاتفورم جوړ کړو. د طالبانو حکومت مسوولیت لري چې یو داسې ملي حکومت جوړ کړي چې ټول په کې برخه ولري، د صنعت او اقتصاد د سوکالۍ لپاره زمینه برابره کړي او په دې برخه کې د هر ډول مثبتو هڅو ملاتړ وکړي، څو له دې جمود او مصرفي مرحلې څخه ووځو او په نړیوال اقتصاد کې برخه واخلو او په سیمه کې د صنعت یو قطب شو.