د رياست الوزرا اداري مرستيال د عامې روغتيا وزارت له مشرتابه سره وکتل

د معمار پرس د خبر له مخې؛ په دغه کتنه کې، د عامې روغتيا وزارت سرپرست په هېواد کې د عمومي روغتیایي وضعیت، په دولتي روغتونونو کې د اصلاحاتو لپاره د عامې روغتیا وزارت طرحې، د روغتیا په برخه کې د عمومي او خصوصي سکټور د مشارکت طرحې، په دولتي روغتونونو کې د دندو ترسره کولو لپاره د متخصصو ډاکترانو هڅولو او د روغتونونو د اړتیا وړ توکو برابرولو په موخه د تدارکاتي بهیر ساده کولو په اړه د ریاست الوزرا اداري مرستيال ته هر اړخيز مالومات ورکړل.
سرپرست وزير په دغه کتنه کې د اسلامي امارت له مشرتابه څخه غوښتنه وکړه، چې په هېواد کې د عامې روغتیا موضوع اهمیت ته په کتو د دې وزارت طرحو او وړاندیزونو ته ځانګړې پاملرنه وکړي.
په ورته وخت کې د رياست الوزرا اداري مرستيال د عامې روغتیا وزارت د تخصصي او مسلکي برخو د فعالیتونو او کړنو قدراني وکړه او ډاډ يې څرګند کړ، چې په دې برخه کې به لا پاملرنه وکړي.