د معمار خبري اژانس د راپور له مخي؛ پاکستاني رسنیو راپور ورکړي دي چې د تورخم پولهایزه لارې د تړل کېدو له امله تر دې دمه دواړو لورو ته له ۲۴۰ میلیونو ډالرو څخه زیات زیان رسېدلی دی.
د اکسپرس ټریبیون ورځپاڼې د دوشنبې، د ۲۷ دلو، په راپور کې ویلي چې د دې لارې تړل هره ورځ دواړو لورو ته شاوخوا دوه میلیونه ډالره تاوان رسوي.
دغه لار د ۲۰۲۵ کال د اکتوبر په میاشت کې د طالبانو او د پاکستاني ځواکونو ترمنځ د پوځي شخړې له امله تړل سوې وه. د تړل کېدو مخکې، تورخم هره ورځ د شاوخوا ۱۰ زره کسانو او ۵۰۰ تر ۷۰۰ وسایطو د تګ راتګ ځای و.
پاکستاني چارواکو ویلي چې له طالبانو سره سوداګري په جدي ډول متأثره سوې ده. همداراز، د طالبانو د مالي چارو ادارې تېره اونۍ اعلان وکړ چې د پاکستاني درملو راوړل افغانستان ته په جدي توګه منع دي او هغو کسانو سره به قانوني چلند وسي چې دغه درمل په قاچاقي توګه هیواد ته واردوي.
