د معمار خبري اژانس د راپور له مخې؛ عطاالله عمري، د طالبانو د کرنې، اوبو لګولو او مالدارۍ وزیر، په تازه څرګندونو کې د سیمې له هېوادونو، په ځانګړې توګه له پاکستان، څخه د افغان کډوالو د ایستلو پر بهیر اندېښنه څرګنده کړه او له دې هېوادونو یې وغوښتل چې د افغانستان د وګړو سره د چلند په وخت کې بشري ارزښتونه مراعات کړي.
د طالبانو د کرنې، اوبو لګولو او مالدارۍ وزیر، د افغان کډوالو د ایستلو پر بهیر په ځانګړې توګه له پاکستان څخه نیوکه وکړه او دا کړنه یې د بشري ارزښتونو او د انساني حقونو خلاف وګڼله.
عطاالله عمري زیاته کړه چې د کډوالو د راستنېدو له پیل راهیسې له ۴.۵ میلیونو څخه زیات وګړي افغانستان ته راستانه سوي دي او د کډوالو سره د کوربه هېوادونو د ملاتړ او همکارۍ په اړتیا یې ټینګار وکړ .
په ورته وخت کې، کارپوهان په دې باور دي چې د افغانانو پراخه کډوالي یوازې د ګاونډیو هېوادونو له لوري د ایستلو پایله نه ده، بلکې ریښې یې د کورنیو ستونزو لکه فقر، بېکارۍ او ټولنیزو او سیاسي محدودیتونو سره تړاو لري.
