آصف دراني، د افغانستان په چارو کې د پاکستان پخواني استازي، د پاکستان د ولسمشر آصف علي زرداري څرګندونې تایید کړې او د طالبانو له خوا د ترهګریزو ډلو د ملاتړ د پایلو په اړه یې خبرداری ورکړی دی.
دراني د دوشنبې په ورځ، د ۲۰ دلو، د افغانستان د وضعیت په اړه وویل چې ترهګري په هغو سیمو کې وده کوي چې هلته ورته زغم یا اسانتیاوې برابرې سي. هغه ټینګار وکړ چې د طالبانو له خوا د ترهګرو ډلو فعالیت ته اجازه ورکول، او همدارنګه د هند له خوا د نیابتي ځواکونو کارول د پاکستان د بېثباتۍ لپاره، کولای سي په سیمه او نړۍ کې جدي او خطرناکې پایلې ولري.
دغه پخوانی پاکستانی چارواکي زیاته کړه چې د سولې ټینګښت مسئولیت منلو ته اړتیا لري او پرته له ستونزو منلو سوله نه سي ترلاسه کېدای.
دا څرګندونې وروسته له هغه مطرح سوې چې د پاکستان ولسمشر تېره ورځ وویل؛ طالبانو افغانستان په داسې حالت کې پریښي چې د سپتمبر ۱۱مې له بریدونو مخکې وخت نه هم ښه نه دی. زرداری خبرداری ورکړی و چې د ترهګرو ډلو ملاتړ یا فعالیتونو ته یی اسانتیا برابرول د یو هیواد د پولې بهر ، په پایله کې یي بېګناه خلک په ټوله نړۍ کې زیانمنوي.
