د افغانستان د رسنیو د ملاتړ سازمان اعلان کړی چې ناظره رشیدي، د کندز ولایت سیمهایزه خبریاله، د طالبانو له لوري د یوې میاشتې نیولو وروسته آزاده سوې ده .دغه سازمان د جمعې په ورځ، د ۱۷ د دلو، د هغې د آزادۍ خبر خپور کړی دی.
د راپورونو له مخې، ناظره رشیدي شاوخوا یوه میاشت مخکې د نورو څلورو ښځو سره د طالبانو له لوري نیول سوي وه . د هغې کورنۍ هم د دې خبریالې د آزادېدو خبر تایید کړی دی.
مخکې هم د طالبانو د پولیسو مشرتابه په کندز کې، د ۲۲ جدی، اعلان کړی و چې د اغلې رشیدي نیول د «جرمي فعالیتونو» له امله دي او د هغې د رسنیزو فعالیتونو سره هیڅ تړاو نه لري. په داسي حال کي کورنۍ یې د افغانستان د رسنیو د ملاتړ سازمان ته ویلي چې هغه بېګناه ده او هېڅ غیرقانوني فعالیت يي نه دی کړی.
د طالبانو په واکمنۍ کې د خبریالانو او رسنیو فعالانو د دوامداره نیولو په تړاو، د افغانستان د رسنیو د ملاتړ سازمان خبرداری ورکړی چې د خبریالانو، په ځانګړي ډول د ښځینه خبریالانو، ګواښ، نیول او فشار لا هم د هېواد په کچه د بیان ازادۍ او د بشري حقونو پر وړاندې جدي ننګونې ګڼل کېږي.
دغه سازمان له طالبانو غوښتنه کړې چې د خبریالانو اساسي حقوق رعایت کړي، د ښځینه خبریالانو امنیت تضمین کړي او د خبریالانو او رسنیزو فعالانو د نیولو او فشار راوړلو څخه ډډه وکړي .
حامد عبیدي، د افغانستان د رسنیو د ملاتړ سازمان مشر، هم اعلان کړی چې اوس مهال لږ تر لږه اوه خبریالان د طالبانو په زندان کې دي. دغه سازمان مخکې راپور ورکړی و چې یوازې شاوخوا اوه سلنه ښځینه خبریالانې په افغانستان کې کولی سي آزادانه فعالیت وکړي او له ۵۵ سلنې زیاتې یې له ګواښ او فشار سره مخ دي.
