د معمار خبری آژانس د راپور له مخې، محمد قاسم خالد، د طالبانو د کورنیو چارو وزارت د مخدره موادو پر ضد د مبارزې مرستیال، له اسکات سمیت، د یوناما د سیاسي دفتر له مشر او ورسره پلاوي سره په خپل دفتر کې وکتل.
په دې لیدنه کې دواړو خواوو د افغانستان د مخدره موادو د مبارزې پر بهیر او د کښت او قاچاق د کمولو لپاره د تخنیکي او برنامو همغږیو د پیاوړتیا په اړه خبرې وکړې.
د یوناما استازو د افغانستان د سرپرست حکومت هڅې وستایلې او دا یې د سیمهییز ثبات او امنیت پر لور یو مهم ګام وبله. د طالبانو د کورنیو چارو وزارت د مخدره موادو پر ضد د مبارزې مرستیال ټینګار وکړ چې د طالبانو اداره د مخدره موادو په وړاندې په بشپړه توګه جدي ده او هېچا ته به اجازه ور نه کړي چې د مخدره موادو کښت، قاچاق، پېر او پلور ترسره کړي.
هغه زیاته کړه چې د روږدو د درملنې، د اعتیاد د مخنیوي، د مسلکي زده کړو، د بزګرانو لپاره د بدیلو کرنیزو پروګرامونو او د نشهيي موادو د له منځه وړلو بهیر د نړیوالې ټولنې له همکارۍ پرته ستونزمن دی. هغه وویل: «مخدره مواد یوازې د افغانستان ستونزه نه ده، بلکې دا یوه نړیواله ننګونه ده، او باید د دې پر ضد مبارزه په ګډه او همغږې توګه وسي.» په پای کې دواړو خواوو د مؤثرې مبارزې لپاره د کورنیو چارو وزارت او د یوناما دفتر ترمنځ د دوه اړخیزو همکاریو او لا زیاتې همغږۍ پر پیاوړتیا ټینګار وکړ.
