د معمار خبری آژانس د راپور له مخې، پاکستاني رسنیو د سهشنبې په ورځ (د لړم ۶مه) د یو امنیتي مقام له قوله ویلي چې د طالبانو او پاکستاني پلاوو ترمنځ د ترکیې په خبرو کې هېڅ ډول هوکړه رامنځته نه سوه او دواړو خواوو د خبرو مېز پرېښی دی. دغه پړاو خبرې د قطر او ترکیې په منځګړیتوب دایرې سوې وې، او موخهیې دایمي اوربند او د پولو هاخوا ترهګرو ډلو د څارنې ګډ سیستم جوړول وو. له درې ورځو خبرو وروسته دواړو خواوو یو بل پر نههوکړې کولو تورن کړل.
طالبانو ویلي چې پاکستان ترې غوښتي دي څو د پاکستانی طالبانو غورځنګ (TTP) ډله د یوې ترهګرې ډلې په توګه ومني او پر ضد یې اقدام وکړي. پاکستاني چارواکو بیا مخکې ویلي وو چې د طالبانو پلاوی چې په استانبول کې ګډون کړی، د خپلواک تصمیم نیولو صلاحیت نه لري او د پرېکړو لپاره باید له کندهار او کابل څخه لارښوونه ترلاسه کړي.
دا په داسې حال کې ده چې د پاکستان د دفاع وزیر خواجه محمد آصف مخکې خبرداری ورکړی وو، که دا خبرې بېنتیجې پاتې سي، اسلامآباد ښايي له طالبانو سره نظامي جګړه پیل کړي.
