د معمار خبري آژانس د راپور له مخې، د بشري حقونو څار بنسټ خبرداری ورکړی چې د نړیوالو مالي مرستو کمېدل او پرې کېدل، په ځانګړې توګه د امریکا او چین له لوري، د ملګرو ملتونو د بشري حقونو څېړنې او د بشردوستانه فعالیتونو توان په افغانستان، اوکراین، روسیه، فلسطین او سوډان کې سخت زیانمن کړی دی.
د دې بنسټ په وینا، د امریکا د مرستو پرې کېدل او د چین له لوري د مالي ژمنو د ورکړې ځنډ د ملګرو ملتونو پر کار مستقیم اغېز کړی او لامل سوی چې اروپایي هېوادونه هم خپلې مالي ونډې راکمې کړي.
د بشري حقونو څار بنسټ ټینګار کړی چې امریکا په ۲۰۲۳ کال کې شاوخوا ۱۳ میلیارده ډالر د ملګرو ملتونو سره مرسته کړې وه، خو دا شمېر سږکال نږدې صفر ته راټیټ سوی دی.
په بیانیه کې راغلي دي: «د ملګرو ملتونو څارنه او څېړنې کولای سي د ملکي وګړو پر وړاندې د جرمونو د ارتکاب مخه ونیسي. د نړۍ مشران باید د ملګرو ملتونو د عمومي اسمبلۍ په غونډه کې له دې سازمان څخه د هغو هېوادونو پر وړاندې دفاع وکړي چې دا سازمان کمزوری کوي.»
دغه بنسټ همدارنګه له نړیوالې ټولنې غوښتي چې په فلسطین، افغانستان او نورو جګړهځپلو هېوادونو کې د روانو بحرانونو پر وړاندې ځانګړې پاملرنه وکړي.
