د معمار پرس د خبر له مخې؛ د چین د بهرنیو چارو وزارت د دوشنبې په ورځ یوه رسمي اعلامیه خپره کړه چې اسراییل باید په غزه کې خپل پوځي عملیات سمدلاسه ودروي او ملکي وګړو ته د بشري مرستو د رسولو د بشپړ بیا پیل لپاره لاره هواره کړي.
دا اعلامیه، چې په نړیوالو رسنیو کې هم خپره شوه، ټینګار وکړ چې دوامداره تاوتریخوالی به یوازې په سیمه کې بشري کړکېچ لا پسې خراب کړي او د جګړې د بندیدو بیړنۍ اړتیا ده.
چینایي چارواکو په ټولو ښکیلو خواوو هم غږ وکړ چې د نړیوال بشري قانون درناوی وکړي او د مرستو رسولو په اسانتیا سره د غزې د خلکو د وضعیت د خرابیدو مخه ونیسي.
