د معمار پرس د خبر له مخې؛ د کاناډا د کډوالو او تابعیت ادارې یوه اعلامیه خپره کړې چې وايي د تاجکستان له خوا د افغان کډوالو د شړلو په اړه راپورونو “ژوره اندیښنه” لري.
په اعلامیه کې ویل شوي چې د کاناډا حکومت، د کډوالۍ نړیوال سازمان (IOM) او د کډوالو لپاره د ملګرو ملتونو د عالي کمیشنرۍ (UNHCR) په همکارۍ، د هغو افغان کډوالو د خوندیتوب او ساتنې ډاډ ترلاسه کولو لپاره کار کوي چې په کاناډا کې بیا میشت کیږي.
د CBC خبري شبکې د راپور له مخې، شاوخوا ۳۰۰۰ افغان کډوال چې د کاناډا له خوا مالي ملاتړ کیږي اوس مهال په تاجکستان کې دي، د خپلو کډوالو د قضیو بیاکتنې ته انتظار باسي.
په هرصورت، په دې وروستیو ورځو کې، د تاجیکستان د حکومت له خوا د دې کډوالو د جبري ایستلو پریکړې سره د دوی د برخلیک په اړه اندیښنې زیاتې شوې دي.
