د معمار پرس د خبر له مخې؛ د یکشنبه ماښام (د سرطان ۲۹مه)، د هرات ولایت والي مولوي نور احمد اسلامجار د ایران د خراسان رضوي ولایت ته د خپل درې ورځني سفر په ترڅ کې په مشهد کې د افغانستان په قونسلګرۍ کې د کډوالو له یوې ډلې سره ولیدل.
دا غونډه د کډوالو د وضعیت بیاکتنې، د هغوی اندیښنو او غوښتنو ته د غوږ نیولو، د سرپرست حکومت او د کډوالو ټولنې د ادارو ترمنځ د اړیکو د پیاوړتیا او د افغانستان په بیارغونه کې د کډوالو د رول په موخه جوړه شوه.
په دې غونډه کې، د کډوالو استازو د مهاجرت مهمو مسلو ته د لا جدي پاملرنې غوښتنه وکړه، په شمول د استوګنې، ژوند، کارموندنې، د ماشومانو زده کړې، د افغانستان په بیارغونه کې ګډون، او د کډوالو د وقار او کلتوري او مذهبي هویت ساتنه.
