د معمار پرس د خبر له مخې؛ په متحده ایالاتو کې یوې فدرالي محکمې د زرګونو افغان کډوالو لپاره د لنډمهاله محافظت شوي حیثیت (TPS) لغوه کولو د ځنډولو غوښتنه رد کړه.
دا پریکړه پدې معنی ده چې د کار جوازونو لغوه کولو او د دې مهاجرینو احتمالي اخراج پروسه به د جولای په ۱۴مه پیل شي.
د پنجشنبې په ورځ، د سرطان په ۱۹مه، د میریلینډ ایالت په محکمه کې فدرالي قاضي تیوډور چوانګ په یوه پریکړه کې اعلان وکړ چې که څه هم د دې قضیې قانوني پروسه دوام لري، د افغان کډوالو قانوني ګټې به پدې موده کې ونه غځول شي.
د دې پریکړې پر بنسټ، شاوخوا ۱۱،۷۰۰ افغان اتباع چې په ۲۰۲۱ کال کې د طالبانو له واکمنۍ وروسته په متحده ایالاتو کې پناه اخیستې وه، د خپل لنډمهاله استوګنې حیثیت، د کار جواز له لاسه ورکولو او په پای کې د شړلو له خطر سره مخ دي.
