د معمار پرس د خبر له مخې؛ د چین ولسمشر شي جین پینګ په آستانه کې د چین-منځنۍ اسیا په دویمه سرمشریزه کې د افغانستان د پراختیا او بیارغونې کې د همکارۍ او سولې او ثبات د رامنځته کولو لپاره د سیمه ییزو هیوادونو ترمنځ د همغږۍ د پیاوړتیا پر اړتیا ټینګار وکړ.
د چینایي رسنیو په وینا، شي جین پینګ په خپله وینا کې د سیمه ییز امنیت او ثبات لپاره د افغانستان د دریځ اهمیت ته اشاره وکړه او ویې ویل: “افغانستان زموږ نږدې ګاونډی دی. موږ باید همغږي پیاوړې کړو ترڅو د دې هیواد سره د پراختیا ظرفیت لوړولو، سولې، ثبات او بیارغونې ته ژر تر ژره رسیدو کې مرسته وکړو.”
هغه د سیمې له هیوادونو څخه هم وغوښتل چې په افغانستان کې د دوامداره ثبات په ملاتړ کې ډیر فعال رول ولوبوي.
