د معمار پرس د خبر له مخې؛ د افغانستان په صنعتي سیمو کې صنعتکارانو ته د ځمکې د ملکیت سندونو د ویشلو مراسم د چهارشنبې په ورځ، د جوزا په ۷مه، په کابل کې د طالبانو د لوړ پوړو چارواکو په شتون کې ترسره شول، چې پکې د طالبانو د اقتصادي چارو مرستیال ملا عبدالغني برادر هم شامل وو.
دا مراسم، چې د صنعتکارانو د ملاتړ او په هیواد کې د پانګونې د هڅولو په هدف تنظیم شوي وو، د صنعتي سکتور د پیاوړتیا او د کورنیو تولیدونکو لپاره د هڅونې د رامینځته کولو په لور یو ګام بلل شوی.
د طالبانو د صنعت او سوداګرۍ وزارت، چې د دې سندونو د ویشلو مسؤلیت لري، اعلان وکړ چې صنعتکارانو ته د ځمکې د ملکیت سندونه ورکول د اسلامي امارت د مشر ملا هبت الله اخوندزاده د مستقیم امر پر بنسټ ترسره کیږي.
