د معمار پرس د خبر له مخې؛ د طالبانو د اطلاعاتو او کلتور وزارت د ګرځندوی، مالي او ادارې مرستیال وزیر قدرت الله جمال نن پنجشنبه، د ثور په ۲۵مه، د ګرځندوی شرکتونو له استازو سره وکتل او له هغوی یې وغوښتل چې له سیلانیانو سره په مناسب او مسلکي ډول چلند وکړي.
هغه د سیلانیانو لپاره د افغانستان د ریښتیني او مثبت انځور وړاندې کولو لپاره د یو ځانګړي انسټیټیوټ د جوړولو اعلان هم وکړ.
د وزارت چارواکو دا هم اعلان کړی چې دوی د ګرځندوی خدماتو معیاري کولو او کورنیو او بهرنیو سیلانیانو ته د ډیرو اسانتیاوو برابرولو لپاره پراخ اقدامات پلي کوي.
د یادونې وړ ده چې په افغانستان کې د ګرځندوی صنعت په وروستیو کلونو کې د ناامنۍ او د مناسبو زیربناوو د نشتوالي له امله له ډېرو ننګونو سره مخ شوی دی.
خو، واک ته له رسېدو وروسته، د طالبانو چارواکو د دې صنعت د بیا راژوندي کولو او د کورنیو او بهرنیو سیلانیانو د راجلبولو لپاره هڅې پیل کړې دي.
په دې اقداماتو کې د نویو تاسیساتو جوړول، د ادارو ترمنځ همکاري، او د افغانستان د نړیوال انځور د ښه کولو هڅې شاملې دي.
د ګرځندوی د ځانګړي انسټیټیوټ جوړول او د خدماتو معیاري کولو باندې ټینګار د دې صنعت د پراختیا لپاره د وروستیو پلانونو برخه ده.
