د معمار پرس د خبر له مخې؛ د طالبانو د ډلې د کورنیو چارو سرپرست وزیر سراج الدین حقاني د یکشنبې په ورځ (د ثور ۲۱مه) په کابل کې د افغانستان د چارو لپاره د چین او پاکستان له ځانګړو استازو سره ولیدل.
دا غونډه د کابل، اسلام آباد او بیجینګ ترمنځ د درې اړخیزو خبرو اترو د تعقیب یوه برخه وه، او د هغې اصلي تمرکز د دریو هیوادونو ترمنځ د سیاسي او اقتصادي اړیکو پراختیا اعلان شوه.
د کورنیو چارو سرپرست وزیر په دې غونډه کې د درې اړخیزې سیاسي او اقتصادي همکارۍ د پیاوړتیا او د راتلونکو ډیپلوماتیکو غونډو د همغږۍ په اړه بحث وکړ.
دوی موافقه وکړه چې د افغانستان، چین او پاکستان د بهرنیو چارو وزیرانو شپږمه غونډه به د پخوانۍ لړۍ د جوړښت پر بنسټ په کابل کې ترسره شي.
